Калинките може да имаат тајна против стареење
Научниците од Сојузниот технолошки институт во Лозана, Швајцарија, откриле дека калинките можат да штитат од една од најголемите причини за стареење.
Калинката содржи претходник на молекула против стареење. Фото: Fir0002/Wikipedia (GFDL 1.2)
Истражувачите откриле дека супстанцијата содржана во калинки може да се трансформира од микробите во цревата во молекула што им овозможува на мускулните клетки да се спротивстават на ефектите од стареењето.
Како што стареат луѓето, нивните клетки се борат да ги рециклираат своите митохондрии, компоненти во клетките кои вршат витални функции.
Деградацијата на митохондријата влијае на здравјето на ткивата, вклучително и на мускулите, со текот на годините и игра важна улога во болести поврзани со стареењето, како што е Паркинсоновата болест.
Научниците откриле дека молекулата наречена уролитин А е во можност да ја стимулира способноста на клетките да ги рециклираат своите митохондрии. Тоа е сосема природна супстанција и нејзиниот ефект е силен и мерлив. Таа е единствената молекула што може повторно да го започне процесот на чистење на митохондриите, позната како митофагија.
Калинките содржат само претходник на оваа чудесна молекула, која се претвора во уролитин А од микробите во цревата. Количината на произведен уролитин може да варира во голема мера, во зависност од флората во цревата.
Некои луѓе воопшто не го произведуваат, а научниците работат на метод за давање уролитин на луѓе кои немаат соодветни микроби да го сторат тоа сами.