Стапката на невработеност во Грција падна на 23,1%
Автор: Валентин Грос/Датум на објавување: 15-09-2016 18:09
Стапката на невработеност во Грција падна во вториот квартал на 2016 година на 23,1%, од 24,6% во сличниот период од 2015 година, објави во четвртокот Централниот завод за статистика на Грција (Елстат), пренесува АП.
Според податоците на Елстат, број од 1.112.075 лица немале работа во периодот од април до јуни 2016 година, што е намалување за 5,8% во споредба со сличниот период од 2015 година.
Највисока стапка на невработеност, 49,1%, е регистрирана кај млади луѓе на возраст од 15 до 24 години.
Стапката на невработеност во Грција е скоро тројно зголемена од почетокот на кризата во 2009 година и останува на највисоко ниво во еврозоната, каде просечната стапка остана на 10,1% во јули.
Во вториот квартал од 2016 година, бројот на вработени е 3.702.613 лица, што е за 2,1% повеќе во споредба со истиот период од 2015 година, објави ЕЛСТАТ.
Грчката економија порасна во вториот квартал, но авансот од 0,2% беше под првичните проценки поради лошите перформанси на потрошувачката и извозот, според податоците објавени на 29 август од Институтот за статистика Елстат.
Податоците на Елстат исто така покажуваат дека грчката економија забележала намалување од 0,9% во вториот квартал на годишно ниво, што е поголем пад од првичната проценка која зборуваше за пад од 0,7%.
И Европската комисија и Централната банка на Грција сметаат на намалување на грчката економија од 0,3% во 2016 година, додека ОЕЦД очекува пад од само 0,2%. Наспроти ова, агенциите за рејтинг „Мудис“ и „С & П“ се попесимистични и очекуваат грчката економија да се намали за 0,7% и 1%, соодветно.