Јапонските лекари предупредуваат дека маските се премногу опасни за деца под 2 години
Децата на возраст под две години не смеат да носат маски! Тоа е предупредување на Детското здружение на Јапонија, кое упати итен апел до родителите при укинување на ограничувањата што се применуваат во земјата за борба против коронавирусот. Причината е што маските можат да го отежнат дишењето кај децата и да го зголемат ризикот од задушување.
Премиерот Шинзо Абе во понеделникот објави прекин на вонредната состојба низ Јапонија откако падна бројот на инфекции со КОВИД-19 низ целата земја, но предупреди дека може да се врати доколку вирусот започне повторно да се шири.
За да се спречи ширењето на коронавирусот, здравствените работници ширум светот препорачуваат носење маски кога е тешко да се одржи социјалното дистанцирање, бидејќи земјите постепено ги укинуваат ограничувањата за запирање на епидемијата КОВИД-19.
Сепак, јапонското здружение за детски болести ги предупреди родителите дека маските се премногу ризични за деца под 2 години.
„Маските можат да го отежнат дишењето бидејќи доенчињата имаат тесни дишни патишта“, што го зголемува притисокот врз нивните срца, велат од здружението, додавајќи дека маските исто така го зголемуваат ризикот од прегревање во нивниот случај.
„Да престанеме со употреба на маски за деца под 2 години“, се вели во соопштението на здружението на својата веб-страница, пренесува Агерпрес.
Здружението соопшти дека досега имало многу малку сериозни случаи на инфекција со коронавирус кај деца и дека повеќето деца се заразиле од членови на семејството.
Американскиот центар за контрола на болести (ЦДЦ) и американската академија за педијатрија исто така велат дека децата под две години не треба да носат маски.