Велика Британија ќе испрати војска во Украина
Автор: Богдан Бишок/Датум на објавување: 06-03-2015 11:03
Британскиот министер за надворешни работи Филип Хамонд во четвртокот при посетата на Киев објави дека Велика Британија ќе испрати воени експерти во Украина за обука на вооружените сили на земјата.
„Ние сме многу горди што можеме да придонесеме на практичен начин за зајакнување на одбранбениот капацитет на украинските вооружени сили со испраќање воени експерти“, рече Хамонд по разговорите во Киев со неговиот украински колега Павло Климкин, пренесува ЕФЕ.
Според шефот на дипломатијата во Лондон, британски експерти ќе учествуваат во обуки и едукативни вежби за украински војници, како што најави британскиот премиер Дејвид Камерон кон крајот на февруари.
Во истиот контекст, Филип Хамонд истакна дека спроведувањето на договорите од 12 февруари во Минск е „задолжително“, додавајќи дека и Велика Британија и САД сметаат дека сегашниот мировен процес за источна Украина е „неповратен“.
„На овој начин, ќе и испратиме јасен сигнал на Русија дека мора да ги почитува нив (договорите од Минск) за да бидат укинати санкциите“, рече британскиот министер, според истиот извор.
Од своја страна, Павло Климкин изјави дека го информирал својот британски колега за напредокот во повлекувањето на тешкото оружје од зоната на конфликтот, како дел од договорите од Минск.
Русија ги критикуваше плановите на Велика Британија и Соединетите држави за испраќање воени инструктори во Украина, како и можната достава на оружје до силите на Киев, велејќи дека сите тие се дестабилизирачки фактори за ситуацијата во источна Украина.
Двете страни вклучени во конфронтациите на украинскиот сепаратистички исток објавија дека повлекле дел од тешкото оружје од фронтот, но меѓународните набудувачи не успеаја да потврдат дека ова повлекување е завршено.