Дебелина, дијабетес, кариес СЗО се залага за данок на шеќер

Светската здравствена организација (СЗО) е убедена дека борбата против дебелината и сродните болести треба да започне со паричникот: На сите влади им се препорачува да воведат посебен данок од најмалку 20 проценти за пијалоците што содржат шеќер.

Ова може да доведе до забележително намалување на потрошувачката на шеќер, соопшти СЗО по повод Светскиот ден на дебелината. Како резултат, помалку луѓе би страдале од прекумерна тежина, дебелина, дијабетес или расипување на забите, според студијата на СЗО.

„Ако владите многу повеќе оданочуваат производи како пијалоци со шеќер, тие можат да ги намалат страдањата и да спасат животи“, рече Даглас Бетчер, директор на Одделот за превенција на неинфективни болести на СЗО. „Тие исто така можат да ги намалат трошоците за здравствениот систем и истовремено да му обезбедат повеќе пари.

Во 2015 година, според податоците на СЗО, 42 милиони деца под пет години биле со прекумерна тежина или дебели во светот. Ова одговара на зголемување од единаесет проценти во рок од 15 години. Бројот на луѓе со дијабетес се зголеми од 108 милиони во 1980 година на 422 милиони во 2014 година.