Диета богата со овошје, зеленчук и риба го намалува ризикот од Паркинсон за 46%

Истражувањето објавено во Европскиот журнал за неврологија сугерира дека исхраната игра важна улога во спречувањето на оваа состојба.

Иако не е јасно зошто одредена храна има заштитен ефект, некои студии сугерираат дека Паркинсонова болест може да се појави кога клетките во телото поминуваат низ деструктивен процес наречен „оксидативен стрес“. Во него штетните материи (кои влегле во организмот поради нездрава исхрана) ги напаѓаат клетките на сличен начин како влијанието на 'рѓата врз телото на автомобилот.

Овошјето, зеленчукот и месото од риба содржат многу антиоксиданти, со што помагаат да се спречи овој штетен процес.

Истражувачите од Универзитетот во Токио ги проучувале навиките во исхраната на 249 пациенти неодамна дијагностицирани со Паркинсон, споредувајќи ја нивната диета со диетата на 368 здрави доброволци.

Научниците ги поделиле учесниците во студијата во три групи, според диетата. Оние во групата „здрава исхрана“ јаделе претежно свежо овошје, зеленчук, риба, мешунки (леќа, грав, грашок), печурки и алги. Црвеното месо и храна со многу маснотии од животинско потекло преовладуваа во исхраната на групата „западна диета“, а исхраната на луѓето од групата „лесна храна“ беше комбинација од другите два стила на јадење.

Резултатите од истражувањето покажаа дека луѓето во групата „здрава исхрана“ - кои конзумирале најмногу растенија и риби - имале 46% помал ризик од Паркинсонова болест во споредба со луѓето кои држат диета со малку растенија и риби.

---