Диета со пост го обновува панкреасот
Дијабетичниот панкреас може да се стимулира да се регенерира со посебен вид диета, која се базира на имитација на пост, објавија истражувачи во САД, информира Би-Би-Си.
Враќањето на функциите на овој орган - кој го контролира нивото на шеќер во крвта - со помош на оваа специјална диета, доведе до исчезнување на симптомите на дијабетес во експериментите извршени врз животни.
Авторите на студијата, објавени во списанието Cell, велат дека диетата за која станува збор го „рестартира“ телото.
Експертите веруваат дека откритието има „многу интересен потенцијал“ и може да се искористи како нов третман за дијабетес.
Експериментите биле извршени врз глувци кои имале посебна диета - „посна диета“.
Кај луѓето, тоа вклучува јадење диета со малку калории, малку протеини, малку јаглени хидрати, но со многу маснотии, пет дена во неделата.
Таа е слична на веганската диета со ореви и супа, но се базира на внес од 800 - 1.100 калории на ден.
Потоа, субјектите можат да јадат апсолутно се што сакаат 25 дена. Затоа, оваа диета не прави ништо друго освен имитира периоди на пост и глад.
Претходните студии сугерираат дека диетата што го имитира постот може да го забави темпото на стареење.
Студиите врз животни покажаа дека оваа диета доведе до обнова на посебен број на клетки во панкреасот наречени „бета клетки“.
Тие откриваат шеќер во крвта и ослободуваат хормон инсулин кога нивото на шеќер во крвта станува превисоко.
Професорот Валтер Лонго, истражувач на Универзитетот во Јужна Калифорнија, рече: „Нашиот заклучок е дека со ставање глувци во екстремна состојба и потоа враќање на нив во нормално калорично ниво - со глад - клетките во панкреасот се стимулираат да користат еден вид молекуларен систем за репрограмирање кој го обновува оној дел од органот што повеќе не работи “.
Експериментите кај глувци покажаа придобивки и кај дијабетес тип 1 и кај тип 2.
Дијабетес тип 1 е предизвикан од имунолошкиот систем кој ги уништува бета клетките, а дијабетес тип 2 е предизвикан во повеќето случаи од начинот на живот, а телото повеќе не реагира на инсулин, развивајќи отпорност на овој хормон.
Други тестови, извршени врз примероци на човечки ткива од луѓе со дијабетес тип 1, дадоа слични ефекти.
Низа одделни тестови, извршени врз човечки пациенти, кои имаа за цел ефекти на диета што го имитира постот, покажаа подобрување на нивото на шеќер во крвта на волонтерите.
Новата студија беше во можност да го објасни механизмот што стои зад тие постари резултати.