Како лекови исчезнуваат од Грција
Автор: КАПИТАЛ/Датум на објавување: 05-11-2012 13:11
Откако швајцарската компанија Рош во септември објави дека запира испорака на производи во јавните болници во Грција, на ред беше уште еден голем производител на лекови да го објави истото, пишува ЕУ Обсервер. Мерк трајно престана да испорачува широко користен лек против рак во Грција, а аптеките толку многу ја намалија цената на лековите, што земјата стана рај за паралелен извоз на лекови. Во надеж дека ќе може да го запре овој феномен и бидејќи повеќе не може да им ги обезбеди домашните потреби на своите граѓани, Грција го запре целиот извоз на лекови на крајот на октомври.
Германската компанија за лекови „Мерк“ престана да доставува лек за пациенти заболени од карцином во јавните болници во Грција поради долг. "Одлуката влијае само на Грција, каде во последно време имавме многу вакви проблеми. Станува збор само за овој производ", изјави директорот на Мерк, Матијас Захер, за германскиот весник Boersen-Zeitung.
Според Ројтерс, станува збор за лекот Ербитукс, кој повеќе нема да може да се администрира бесплатно на болнички пациенти, но ќе може да се купува директно од аптеките. Овој лек против рак е втор најпродаван производ на Мерк во светот и оствари профит од 855 милиони евра во 2011 година. Групацијата објави вкупни приходи од 2,8 милијарди евра во 2012 година, за 11,6% повисоки од претходната година.
Според извештајот на ГлобалДата во август, аптеките во Грција постојано ги намалувале цените на лековите за да можат граѓаните да си дозволат да ги купуваат кога ќе бидат потребни. Иако е добра за пациентите, оваа мерка доведе до паралелен извоз на лекови, кои се продаваат поскапо.