Како туристите ќе патуваат во Европската унија
Министрите за туризам на ЕУ во понеделникот разговараа за тоа како би можеле да му помогнат на овој сектор погоден од пандемијата на коронавирусите и се согласија да воведат таканаречени „пасоши Ковид-19“, како и да ја истражат можноста за отворање на специјални патнички коридори, јавува ДПА., според Агерпрес.
„Туризмот забележа огромен и неочекуван пад поради пандемијата на коронавирусите“, рече хрватскиот министер за туризам, Гари Капели, кој беше претседател на видео-конференцијата, бидејќи Хрватска во моментот претседава со ЕУ.
„Потребен ни е заеднички план, на европско ниво, за управување со кризата“, рече Гари Капели на крајот од состанокот. Овој план треба да вклучува документ „врз основа на протокол кој важи во сите земји-членки на ЕУ“, додаде хрватскиот официјален претставник.
„Ние исто така започнавме да зборуваме за воздушни, железнички и копнени коридори за патување и се надевам дека ќе можеме да постигнеме договор и за нив. Каде што не можеме, ќе одиме на билатерални договори со заинтересираните земји “, рече и Гари Капели.
Хрватска, земја чие крајбрежје на Јадранското Море се протега на повеќе од 1.500 километри и вклучува илјадници острови, во голема мера зависи од приходите од туризам, како и Грција, Италија, Шпанија и Португалија.
Но, целата Европска унија е заинтересирана за тоа како се развиваат работите во туризмот, сектор кој е одговорен за 10% од бруто домашниот производ и обезбедува работни места за скоро 12% од сите вработени во ЕУ, вели хрватскиот министер за туризам.
Од своја страна, европскиот комесар за внатрешен пазар Тиери Бретон рече дека на туристичкиот сектор ќе му требаат „невидени средства за надминување на кризата“. Според Тиери Бретон, „потребен е нов Маршалов план со силен европски буџет за повторно започнување на Европа и за изградба на посилна и поотпорна унија“, рече европскиот комесар во изјавата објавена на крајот од видео-конференцијата од министрите за туризам.