Русија трајно го блокира пристапот до Youtube
Автор: КАПИТАЛ/Датум на објавување: 18-09-2012 12:09
Рускиот министер за комуникации Николај Никифоров на својот профил на Твитер објави дека пристапот до страницата ЈуТјуб може да биде целосно блокиран во Руската Федерација поради антиисламскиот филм „Невиност на муслиманите“, што предизвика избувнување на антиамериканско насилство во исламскиот свет и во многу европски држави, што резултираше со бројни жртви.
Одлука во врска со ова ќе се спроведе помеѓу 3 и 5 ноември по стапувањето во сила на законот за регистар на забранети страници, врз основа на ширење порнографски материјал, детска порнографија, поттикнување расна омраза и екстремизам итн.
Одговорот на министерот доаѓа откако беше поднесена жалба до Генералното обвинителство на Русија од страна на (муслиманскиот) парламентарец од Државната дума, Руслан Гатаров, кој го спореди антиисламскиот филм со „детска порнографија“. Обвинителството веќе донесе одлука во врска со упатувањето на заменикот, категоризирајќи го филмот како „екстремистички“.
Обвинителите побараа од московскиот суд да забрани емитување на филмот во Руската Федерација, а потребна е и судска одлука за правната постапка за вклучување на YouTube на списокот на забранети страници. Всушност, според постапката што стапува на сила, руските власти уште еднаш ќе побараат од Јутјуб да го отстрани предметниот филм, всушност 14-минутен трејлер, и доколку не се придржува, тогаш пристапот до него ќе биде целосно блокиран на територијата на Руската Федерација.