17-годишен тинејџер ослепел бидејќи јадел само помфрит
17-годишен британски тинејџер го изгубил видот откако неколку години јадел само помфрит и леб. Недостатокот на витамини и минерали доведе до појава на оптичка невропатија, дисфункција на оптичкиот нерв. Состојбата е реверзибилна ако се открие рано, но ако не се лекува правилно, видот трајно се губи.
Од основно училиште, тинејџерот јадел само помфрит, чипс и леб. Многу ретко јадеше парче шунка или колбас.
„Неговата дневна диета се состоеше од помфрит земен од блискиот ресторан за брза храна. Земаше и чипс и, неколку пати, малку бел леб со парчиња шунка, скоро и да немаше овошје или зеленчук “, рече лекарот што го лекуваше. „Ова беа единствените намирници кои тој ги толерираше.
Медицинските тестови откриле дека младиот човек страдал од неухранетост и повеќекратни недостатоци на витамини. На 14 години, тој веќе беше анемичен и му беше дијагностициран недостаток на витамин Б12.
И покрај тоа што матичниот лекар му препишал инјекции на витамин Б12 и го советувал како да ја подобри исхраната, момчето продолжило да го губи видот и слухот.
Три години подоцна бил префрлен во Офталмолошката болница во Бристол поради прогресивно намалување на видната острина, достигнувајќи слепило. Лекарите му дијагностицирале оптичка невропатија, а последователните тестови покажале дека болеста настанала поради недостатоци во исхраната.
И покрај тоа што немал мала тежина, тинејџерот страдал од неухранетост поради нарушување во исхраната. Тој немал витамин Б12, витамин Д, бакар, селен и цинк.
„Тој веќе немаше минерали во коските, нешто навистина шокантно за момче на негова возраст“, додаде докторот.
И покрај тоа што добивал додатоци на храна, неговиот вид не започнал да се подобрува.
Лекарите веруваат дека исхраната на адолесцентот и недостатокот на хранливи материи довеле до појава на нутриционистичка оптичка невропатија, дисфункција на оптичкиот нерв. Тоа е ретка компликација на недостаток на хранливи материи.
Недостаток на витамини Б1, Б2, Б3, Б6, Б9, Б12 и железо, калциум, магнезиум и бакар може да предизвика оптичка невропатија, состојба што може да се меша со други нарушувања ако лекарот не ги знае навиките на јадење на пациентот.
Болеста е реверзибилна доколку се открие рано, но доколку не се лекува навреме, може да доведе до трајно уништување на оптичкиот нерв и слепило.