Бран на теории на заговор по убиството во САД на кинескиот истражувач кој студирал КОВИД-19
Убиството на кинески истражувач во САД, кое беше многу блиску до важно откритие за коронавирусот, ги поттикна теориите на заговор ширум светот.
Бинг Лиу, 37-годишен доцент на Медицинскиот факултет на Универзитетот во Питсбург, беше пронајден мртов во неговиот дом во саботата. Колегите рекоа дека е близу до „значајно откритие“ за Ковид-19, со наводите преку кои се шпекулираше дека бил убиен. ВЕСТИ на Би-Би-Си.
Но, полицијата вели дека станува збор за убиство проследено со самоубиство.
Како почина Бинг Лиу
Тој беше пронајден со повеќе повреди на главата, вратот, торзото и екстремитетите во неговиот дом во предградијата на Питсбург, соопшти локалниот полициски оддел.
Напаѓачот е идентификуван како 46-годишен софтверски инженер Хао Гу. Властите велат дека тој извршил самоубиство откако се вратил во автомобилот.
Лиу и Гу се познавале, велат детективите.
Истрагата утврди дека станува збор за кривично дело проследено со самоубиство по „долгиот спор околу интимниот партнер“. Детективите велат дека има „нула докази“ дека случајот е поврзан со истражувањето на Лиу и актуелната криза во јавното здравство.
Кој беше Бинг Лиу
Во изјавата, колегите на Лиу велат дека тој бил исклучителен истражувач кој „бил на работ да направи значајни откритија“ за разбирање на клеточните механизми на инфекција со коронавирус.
Тие жалат за смртта на Лиу и ветија дека ќе го завршат неговото истражување „во обид да му оддадат почит на неговата научна извонредност“.
Лиу, по потекло од Кина, стекнал дипломски и докторски дипломи во Сингапур, по што започнал со својата истражувачка работа во САД. Тој соработувал со биолози и клиничари за проучување на човечкиот имунитет.
Кои теории на заговор кружат
„О, Боже мој“, напиша корисник на кинеската платформа за социјално вмрежување „Веибо“. „Изгледа како сцена од Невозможна мисија. Можеби открил дека вирусот потекнува од американска лабораторија “.
Многу слични коментари сугерираат дека Лиу бил убиен затоа што требало да ја открие мистеријата за потеклото на коронавирусот. Кинеските власти и државните медиуми претходно промовираа неоснована теорија дека вирусот потекнува од Соединетите држави, а американските војници го донеле во Вухан.
Многу коментари на Веибо сугерираат дека кинеското потекло на Лиу може да го загрозило во Соединетите Држави, иако нема докази дека бил мета на напад поради неговата етничка припадност.
Глобал тајмс, страница поврзана со кинеските државни медиуми, објави статија за разни шпекулации за смртта на Лиу. Во меѓувреме, на Твитер, некои неосновано шпекулираа дека кинеската влада можела да игра улога во овој случај.
На позадината на пандемијата Ковид-19, различни теории на заговор за вирусот и неговото потекло продолжуваат да се шират на интернет-платформите. Некои непроверени тврдења се дури промовирани од политичари во САД и Кина.