Епидемија на ХИВ во Русија
Русија има една од највисоките стапки на ХИВ инфекција во светот и се верува дека околу 1% од популацијата на земјата е заразена. Рускиот претседател Владимир Путин смета дека епидемијата е „закана за националната безбедност“, пренесува ДПА, цитирана од Агерпрес.
„Ситуацијата се влошува“, рече Вадим Покровски, шеф на федералниот центар за истражување и превенција со седиште во Москва специјализиран за ХИВ и СИДА.
Претседателот Владимир Путин во декрет годинава го опиша ХИВ како „закана за националната безбедност“, бидејќи Русија се соочува со општ пад на населението.
Зад овој проблем стои недостатокот на информации и ограничените опции за третман. Сексуалното образование на малолетници е табу тема, комплицирана од законодавството што забранува „хомосексуална пропаганда“.
Руското Министерство за здравство тврди дека во земјата има околу 900.000 лица заразени со ХИВ. Покровски верува дека вистинската бројка е околу 1,5 милиони.
За споредба, има околу 88.000 лица заразени со ХИВ во Германија, околу 0,1% од населението, според Институтот за контрола на болести Роберт Кох.
Повеќе од половина од новите руски инфекции се пренесени преку сексуални односи меѓу мажи и жени, изјави Покровски за ДПА во пресрет на Светскиот ден на СИДА, кој паѓа на 1 декември секоја година.
Минатата година имало 36.000 смртни случаи меѓу луѓето кои живеат со ХИВ во Русија - рекорден број од регистрирањето на првите пациенти во 1987 година во времето на Советскиот Сојуз.
Покровски смета дека износите наменети за третман на ХИВ-инфицирани лица во Русија се премногу мали, а за следната година се очекуваат 29 милијарди руби (450 милиони американски долари).
Три пати помалку од потребното, бидејќи на Русија и недостасуваат најсовремени лекови, опрема за дијагностицирање и персонал, рече тој.
Повеќе од еден милион луѓе во Русија се ХИВ позитивни и „за жал, бројот продолжува да расте“, изјави Сергеј Абдурахманов, директор на Московскиот центар за СИДА.
„Ова веќе не е проблем што ги погодува хомосексуалците, интравенски корисници на дрога и сексуалната индустрија“, рече тој. „ХИВ е закана за целото руско општество“, рече Абдурахманов.