Франција бара да се стави крај на конфликтот во Украина, во замена за испорака на бродот „Мистрал“ во Русија

Француско претседателство објави во средата прекин на испораката на првиот брод „Мистрал“, од двата купени од Москва во Париз, со образложение дека не се исполнети „условите“ за оваа испорака, потсетува Медијафакс.

Запрашан на прес-конференција за какви се условите, портпаролот на Министерството за надворешни работи Ромен Надал рече дека „потребно е да се спроведе нацрт примирје - опција што Франција ја поддржува“. Цитирајќи го францускиот министер за надворешни работи Лоран Фабиус, тој додаде дека е потребно „да се најде политички договор за прекинување на судирите меѓу Украина и Русија, или директно или со поддршка на медијатори“.

„Во моментов, овие услови не се исполнети и ние сакаме да бидат исполнети во следниот период“, рече портпаролот.

Државниот секретар за реформи, Тиери Мандон, објасни, пак, дека одлуката на француската страна претставува „суспензија на испораката“ на бродот „Мистрал“. „Франција сака да принуди мировен договор“ во Украина, додаде тој во изјавата за Радио Франс Интернационале.

Според извори блиски до случајот, и покрај прекинот на испораката на воениот брод „Мистрал“, неговата изградба засега продолжува.

Продажбата на двата бродови „Мистрал“ на Русија, завршена во јуни 2011 година, беше проценета на околу 1,2 милијарди евра од тогашната француска влада. Првиот брод беше именуван како „Владивосток“, а вториот треба да се вика „Севастопол“, по Кримското пристаниште, украинскиот полуостров припоен оваа година од Русија.

Бродовите „Мистрал“ се повеќенаменски воени бродови, способни да носат хеликоптери и тенкови. Мистрал се најголемите воени бродови во Франција, по носачите на авиони Шарл де Гол.

---