Нови протести во Иран за соборувањето на украинскиот патнички авион - Европа ФМ

Демонстрантите се собраа синоќа во Техеран и другите ирански градови во знак на протест против соборувањето на украинскиот авион, што е трет ден по ред на антивладини демонстрации, пренесува Ројтерс.

Комплетна слика за протестите во Иран е тешко да се добие поради ограничувањата на медиумите и социјалните мрежи во земјата. Сепак, снимките објавени на Интернет покажуваат десетици, можеби стотици, демонстранти кои излегоа на улиците на Техеран, но и на Исфахан, третиот по население град во Иран.

На снимките се гледа како студенти извикуваат пароли против водачите на иранскиот теократски режим.

Сликите и снимките од претходните протести покажаа повредени луѓе и барички крв, а во позадината се слушаа истрели, иако полицијата во Техеран негира дека тие отвориле оган.

Режимот во Техеран во саботата призна дека противвоздушна единица на Револуционерната гарда случајно го соборила авионот на „Украински ерлајнс“, инцидент во кој загинаа 176 лица во авионот. Авионот беше соборен бидејќи Иран стравуваше од одмазда откако ги нападна воените бази во Ирак како одмазда за американскиот атентат врз иранскиот воен командант Касем Солеимани.

---