Парламентот ги блокира плановите за ослободување на одредени пестициди

Објавено на 05.10.2017 година

Парламентот во средата го блокираше предлогот на ЕК што би ослободил некои хемикалии од пестициди да бидат идентификувани како ендокрини нарушувачи.

Европратениците велат дека мандатот на Комисијата е надминат со овој предлог за ослободување на супстанциите за кои инаку се смета дека го напаѓаат ендокриниот систем на организмот, во пестициди, од критериумите за идентификација.

Приговорот, поднесен од ytајт Гутеланд и Бас Еикхаут, беше одобрен со 389 гласа „за“ и 235 „против“, со 70 воздржани, што беше апсолутно мнозинство за блокирање на предлогот. Европската комисија ќе треба да подготви нова верзија на текстот, земајќи го предвид мислењето на Парламентот.

Законите на ЕУ бараат пестицидите или биоцидите да немаат негативно влијание врз ендокриниот систем на видови, освен оние насочени. За да се примени ова законодавство, на ЕУ и е потребен список на научни критериуми за идентификување на ендокрините нарушувачи.

Предлогот на Комисијата се однесуваше на научни критериуми за идентификување на својствата со негативни ефекти врз ендокриниот систем во хемикалиите. Идентификувањето на овие научни критериуми е прв чекор кон мерките за намалување на нивното присуство и заштита на здравјето на граѓаните.

Судот на правдата во декември 2015 година пресуди дека ЕК го прекршила законот на ЕУ не објавувајќи ги критериумите за утврдување на ендокрини нарушувачи, закажани за крајот на 2013 година.

Во извештајот на УНЕП/СЗО, ендокрините нарушувачи се нарекуваат „глобална закана“, а се однесува на, меѓу другото, растечките трендови на многу болести поврзани со ендокриниот систем кај луѓето и животинскиот свет. Постојат докази за негативни ефекти врз репродуктивниот систем (неплодност, рак, малформации), но исто така и врз работата на тироидната жлезда, функцијата на мозокот, дебелината, метаболизмот и хомеостазата на гликозата, покажува студијата.

Информации земени од Европскиот парламент.