Промена на диета, вежбање и ментално вежбање го намалува ризикот од заболување на мозокот
Едноставните промени во животниот стил, како што се усвојување на урамнотежена исхрана, дневна програма за вежбање и игри или активности кои го стимулираат умот, може значително да го намалат ризикот од развој на мозочно заболување, како што е деменција. пренесува Медијафакс.
Студијата, која официјално ќе биде претставена во Доха во февруари 2015 година на Светскиот самит за иновации за здравје, беше спроведена на 1.200 мажи и жени на возраст над 60 и над 70 години. Според претходните студии, првите знаци на ментално влошување може да се појават веќе на 40-годишна возраст.
Во истражувањето, половина од учесниците ја сменија својата исхрана и започнаа да прават вежби за обука на умот. Исто така, некои од нив беа следени од гледна точка на здравјето на срцето, а нивната социјална активност се зголеми.
Според студијата, многу случаи на деменција и други мозочни состојби може да се избегнат ако се преземат активности за намалување на крвниот притисок, со оглед на тоа што неуспехот да се третираат проблеми со крвниот притисок на 40-годишна возраст доведува до 60% зголемување на ризикот од развој деменција подоцна во животот. Исто така, дијабетисот тип II, поврзан со зголемување на телесната тежина, е главен фактор на ризик, според студијата.
Другите фактори на ризик споменати во истражувањето вклучуваат депресија, дебелина, недостаток на вежбање и пушење.
Сепак, прелиминарниот извештај на студијата предупредува дека не постои познат метод што може целосно да спречи ментални болести како што е деменција.
Студијата ќе биде презентирана во февруари во Доха од страна на лордот Ара Варкес Дарзи, британски лекар и истражувач со иранско потекло, кој исто така служеше и како министер за здравство во британската влада, под раководство на лабуристичкиот премиер Гордон Браун.