Русија зборува за глобална катастрофа САД водат војна во Украина заради интереси
Економскиот советник на Владимир Путин, Сергеј Глазиев ги обвини Соединетите држави дека се обидуваат да предизвикаат воен конфликт меѓу Русија и европските земји користејќи ја Украина за свои економски интереси.
Тој рече дека американската економија имала корист од војните во Европа во минатото, пренесува Ројтерс.
„Сега, САД водат војна во Украина, откако организираа државен удар и ги поставија своите луѓе на чело, да ја користат Украина како детонатор против Русија и Европа“, обвини советникот.
„Во Украина владее хаос, а хаосот станува се повеќе во обележјата на глобалната катастрофа“, продолжи тој.
Глазиев не презентираше докази за поддршка на неговите тврдења, но рече дека се гледа дека странски платеници доаѓаат во Украина да се борат против вооружените проруски сепаратисти на истокот.
Советникот на Путин инсистира на тоа дека веќе има „вистинска војна“ во Украина.
„Секоја војна во Европа завршува со големи придобивки за Америка во однос на зголемувањето на геополитичкото влијание, а САД сè уште се придржуваат до овие обичаи“, рече тој.
Рускиот министер за надворешни работи Сергеј Лавров неодамна се осврна и на странските платеници на истокот, откако германско издание напиша дека повеќе од 400 американски платеници дејствуваат на југоистокот на Украина со владината армија во Киев.
„Чекаме одговори, бидејќи имаме големи сомневања дека информацијата може да биде вистинита“, рече тогаш Лавров.
Обвинувањата на советникот на Путин доаѓаат во моментот кога епицентарот на борбите во Украина се префрли во Славјанск во четвртокот, каде бунтовниците соборија хеликоптер на украинската армија, при што загинаа 14 војници.
Конфронтациите се случуваат на теренот, во центарот на градот, но и во Краматорск. Изминативе денови се пријавени десетици смртни случаи, а бројот на жртвите драматично се зголемува.