Списокот со 71 лице во авионот што се сруши е објавен во јавноста

Официјалниот список на патници и членови на екипажот на авионот Антонов Ан-148, кој се урна денес, 12 февруари, го објави руското Министерство за вонредни ситуации. Меѓу патниците имало и едно дете и двајца тинејџери. Сите, освен тројца патници, биле од регионот Оренбург, каде што се наоѓа градот Орск, изјави за новинската агенција Тас градскиот градоначалник Андреј Одинцов. Двајца патници биле од Москва, а третиот од Санкт Петербург, информира Би-Би-Си.

списокот

Список на патници и екипаж

Рускиот авион се урна по полетувањето од московскиот аеродром Домодедово кон Орск, при што загинаа сите 65 патници и шест члена на екипажот. Авионот Антонов Ан-148, кој припаѓаше на „Саратов ерлајнс“, исчезна неколку минути по полетувањето и се сруши во близина на селото Аргуново, околу 80 километри југоисточно од Москва. Не е јасна причината за несреќата. Истражителите и екипите за итни случаи работат на местото покриено со снег. Тимот за реакција пронашол парчиња од остатоците и телата во прилично голем радиус од местото на несреќата. Една од црните кутии е пронајдена, велат властите. Авионот го управувал искусен пилот, со 5000 часа лет, изјави авиокомпанијата за Риа-Новости.

Авионот полетал во 14:21 часот по московско време. Контактот со екипажот беше изгубен четири минути подоцна. Интернет-страницата за следење на летот Flightradar24 покажува дека авионот последователно се спуштил со брзина од 1.000 m во минута. Очевидци за руските медиуми изјавија дека авионот горел додека се спуштал. Руски официјален претставник ги демантираше информациите како пилотот да пријавил дефект.

Претседателот Владимир Путин изрази сочувство до семејствата на жртвите и најави истрага за причините за несреќата. Путин ја откажа работната посета на Сочи по воздушната трагедија, изјави портпаролот на Кремlin, Дмитриј Песков.