Нов тест на крвта може да открие рак четири години пред да се појават симптомите

Тест на крвта може да открие рак четири години пред првите симптоми, велат кинески истражувачи. Тие велат дека неинвазивниот тест на крвта, наречен PanSeer - открива рак кај 95% од луѓето кои немаат никакви симптоми, но потоа добиваат дијагноза, пишува Гардијан.

„Покажавме дека пет карциноми можат да се откријат со крвен тест заснован на ДНК метилација, четири години пред дијагнозата“, пишува истражувачкиот тим во списанието „Nature Communications“.

Во исто време, тие велат дека тестот не предвидува рак, туку открива канцерогени израстоци кои не предизвикуваат симптоми.

Ваквите тестови, познати како „течна биопсија“, станаа во фокусот на многу истражувања, бидејќи тие обезбедуваат неинвазивен начин за анализа на пациентите.

Ова не е прва студија која известува за позитивни резултати за рано откривање на рак со тест на крвта. Сепак, тимот рече дека истражувањето е интересно бидејќи уште еднаш покажало дека болеста може да се открие пред пациентите да покажат какви било симптоми.

Резултатите од студијата откриле дека анализата на крвта PanSeer открила карцином кај 88% од учесниците кои веќе биле дијагностицирани и кај 95% од учесниците на кои не им бил дијагностициран карцином, но потоа продолжиле да ја развиваат болеста. Сепак, студијата се засновала на мал број случаи, а тестот не може конкретно да утврди за каков вид на рак станува збор, пишува Медијафакс.

---