Претседателот на Украина ги игнорира предупредувањата на Путин за потпишување договори со ЕУ
Автор: КАПИТАЛ/Датум на објавување: 24-08-2013 16:08
Украинскиот претседател Виктор Јанукович во саботата ја потврди посветеноста на неговата земја за потпишување клучни договори со ЕУ, вклучително и трговија, и покрај предупредувањата на рускиот претседател Владимир Путин со можни казнени мерки, пренесува Ројтерс.
По повод Денот на независноста на Украина, Јанукович како да ги игнорираше тврдењата на Путин. Зборувајќи за продлабочување на односите со Русија и другите членки на Царинската унија, тој посочи дека Киев е посветен на потпишување договори за асоцијација и слободна трговија со ЕУ на самитот во Вилнус, Литванија, во ноември.
„За Украина, асоцијацијата со ЕУ мора да стане важен фактор во формирањето на модерна европска држава“, рече украинскиот претседател. „Во исто време, ние мора да го одржиме и продолжиме развојот на односите и процесите на интеграција со Русија, земјите од евроазиската заедница и другите меѓународни лидери и со нови центри за економски развој“, нагласи Јанукович.
Русија, најважниот трговски партнер на Украина, минатата недела сигнализираше голема загриженост во врска со политичката евроинтеграција на Киев, спроведувајќи строги царински контроли при увозот од Украина и предизвикувајќи некои царински одложувања. Владимир Путин неодамна рече дека асоцијацијата ЕУ-Украина и договорот за слободна трговија можат да влијаат на руските производи. Лидерот на Кремlin предупреди дека членките на Царинската унија/Русија, Белорусија и Казахстан/можат да преземат „мерки за заштита“ за да ги бранат своите пазари.
Москва со години се обидува да ја убеди Украина, поранешна советска република, да се оддалечи од Европа и да се приближи до проектот Евроазиска унија на Русија, Казахстан и Белорусија. Украина и Европската унија се очекува да потпишат договор за асоцијација во ноември, кој предвидува и амбициозен трговски договор. ЕУ е подготвена да го потпише договорот доколку Киев направи напредок кон владеењето на правото и го преиспита својот став за ситуацијата на опозицијата и поранешната украинска премиерка Јулија Тимошенко.
Економијата на Украина се заснова на извоз на жито, челик, јаглен, гориво, нафтени производи и хемикалии. Повеќе од 60% од извозот се врши во други поранешни советски републики, особено во Русија, Белорусија и Казахстан.