Русија забрани увоз на вина од Република Молдавија

Увозот на вина од Република Молдавија беше забранет поради тврдењата поврзани со нивниот квалитет, се вели во коминикето на Роспотребнадзор. „Забрануваме увоз во Руската Федерација на сите вина од Република Молдавија“, се вели во текстот, пренесува Унимедија.

Според шефот на руската санитарна служба, забраната ќе се применува сè додека Руската Федерација „нема да види спроведување на конкретни мерки од страна на Република Молдавија насочени кон системско решавање на проблемот“.

„Нема да играме улога на дадилка за економијата на Република Молдавија“, рече официјалното лице.

Според руските експерти, во сериите молдавски вина увезени во Руската Федерација е пронајдено „прекумерно количество пластификатори“. „Соодветно, има неправилности во технологијата на обработка и складирање на готови производи, што е недопустливо за цивилизиран процес на производство“, рече Генадиј Онишченко.

„Не гледаме причина да ги ставаме во функција нашите лаборатории, со кои молдавските власти треба да се справат“, заклучи рускиот официјален претставник. Според него, во Република Молдавија не постои систем за контрола на квалитетот на алкохолот.

Владата на Кишињев објави дека го испитува соопштението на Руската здравствена служба. „Властите во Кишињев се во постојан дијалог и ќе продолжат да комуницираат со руските партнери, со цел да се разбере природата на приговорите и да се формулира реакција во врска со ова“, рече портпаролот на молдавскиот премиер во соопштението за јавноста.

---