Оксана Шачко, една од основачите на Фемен, беше пронајдена мртва во Париз

Една од основачките членови на украинската феминистичка група Фемен, Оксана Шачко е пронајдена мртва во нејзиниот стан во Париз, изјавија во вторникот претставниците на групата Фемен, пренесува Ројтерс.

"Почивај во мир! Храбрата Оксана Шачко нè напушти. Плачеме со нејзиното семејство и пријателите и ја чекаме официјалната верзија на полицијата за тоа што се случило. Засега знаеме дека Оксана е пронајдена мртва вчера, на 23 јули, во нејзиниот стан во Париз„Членовите на Фемен изјавија во објава на официјалниот блог. Таа почина на 31 година, а причината за смртта сè уште не е потврдена, пишува медиафакс.ро.

Групата Фемен е основана во Киев во 2008 година од Оксана Шачко, Ана Гуто и Ина Шевченко, а стана позната во Европа по топлес протести против сексуалниот туризам, хомофобијата и верските институции.

Прогонета во Франција во 2013 година, каде доби политички азил, Оксана Шачко ја напушти организацијата и ја продолжи својата работа како сликарка.

---