Руските свештеници повеќе нема да благословуваат оружје за масовно уништување, туку само оружје за самоодбрана
Комисија на Руската православна црква одлучи дека отсега па натаму, свештениците ќе ги благословуваат само вооружените сили и оружјето за самоодбрана, пренесува Телеграф.
По одлуката на Комисијата, се очекува руските свештеници повеќе да не одржуваат богослужби за оружје за масовно уништување, како и за други оружја од големи размери.
Односите меѓу Руската православна црква и Владата или армијата се повеќе се приближуваа со текот на годините. Всушност, вооружените сили имаат вклучено свештеници за да всадат патриотизам и верба во Бога во војската.
Во руската православна традиција, свештеник може да даде благослов на верник или може да благослови куќа или брод. Меѓутоа, во последниве години, свештениците беа поканети да молат и да попрскаат со света вода врз најновите типови на вооружени системи во Русија, предизвикувајќи негодување кај некои членови на црквата кои се противат на ваквата практика.
Фотографиите на кои руските свештеници прскаат тенкови и ракети со света вода станаа меми на Интернет.