Што зборува Владимир Путин за можна средба со Доналд Трамп

„Штом американската страна е подготвена, оваа средба ќе се одржи, се разбира според мојот распоред“, им рече Путин на новинарите за време на патувањето во Кина.

"Самиот американски претседател рече и повтори дека сметал дека таквиот состанок е корисен. Можам да потврдам. Така е", додаде рускиот претседател.

Тој додаде дека не разговарал со Доналд Трамп каде може да се одржи ваква средба, но дека „многу“ земји се подготвени да бидат домаќини на тоа, особено Австрија.

„Тоа е само техничко прашање“, рече тој.

„Важно е ваквите состаноци, кога ќе се одржат, да имаат конкретна содржина“, додаде Путин.

Според „Волстрит журнал“, рускиот претседател побарал од австрискиот канцелар Себастијан Курц, за време на посетата на Виена на почетокот на оваа недела, да му помогне да организира самит од ваков тип што Вашингтон го разгледува.

И покрај европските санкции против Русија, Австрија остана блиска до Москва и, за разлика од другите европски земји, не ги протера руските дипломати по труењето на поранешниот руски таен агент и неговата ќерка во Велика Британија во март.

---