Твитер и Фејсбук ја обвинуваат Кина дека користи лажни сметки за поткопување на протестите во Хонг Конг

кина

Твитер АД објави дека суспендирал 936 сметки и рече дека нивните активности очигледно ги координирала Кина. Компанијата додаде дека овие сметки се само поактивниот дел од кампањата, а поголема мрежа од околу 200.000 сметки е суспендирана пред таа да стане суштински активна.

Сметките имале за цел да ги поткопаат легитимитетот и позициите на протестното движење во Хонг Конг, објави Твитер.

Фејсбук соопшти дека отстранил сметки и страници од мала мрежа по информациите добиени од Твитер. Истрагата за овој случај откри врски со лица поврзани со кинеските власти.

Кинеската амбасада во САД и Стејт департментот Вашингтон не одговорија на барањата да дадат коментар за случајот.

Компаниите за социјални мрежи преку Интернет се под притисок да се борат против кампањите за незаконско политичко влијание, откако американските истражители заклучија дека Русија интервенирала на претседателските избори во САД, одржани во 2016 година.