Силен тајфун ќе ја погоди Јапонија во сабота -

Тајфунот Чан-хом во саботата ќе погоди неколку региони на Јапонија, носејќи силни бури и обилни дождови во јапонскиот архипелаг, објавија локалните медиуми, пренесува Агерпрес.

Според цитираниот извор, тајфунот продолжува да се приближува до Јапонија. Островите Изу, јужно од Токио, се соочуваат со исклучително голем ризик од лизгање на земјиштето, објави весникот „Мајничи шимбун“, повикувајќи се на јапонската метеоролошка агенција.

Агенцијата предвиде дека циклонот треба да ослабува по интензитет во текот на денот, но ги предупреди жителите долж брегот на Пацификот за обилните дождови и зголемувањето на водостојот. Агенцијата предупреди и на ризик од лизгање на земјиште, поплави и високи бранови во големи области на земјата. Засега нема пријавено поплави или повредени.

Пред една година, тајфунот Хагибис ги погоди централниот и североисточниот дел на Јапонија, предизвикувајќи поплави и лизгање на земјиштето, во кои загинаа околу 100 лица.

---